អាចពោលបានថា ជាកាតព្វកិច្ចមួយ ដែលស្ដ្រីជាមាតាទូទៅត្រូវស្វែងយល់ក្នុងរឿងខាងលើនេះ ជាពិសេសស្ត្រីដែលទើបនឹងក្លាយខ្លួនទៅជាមាតាថ្មីថ្មោងនោះ ។ ខាងក្រោមនេះ គឺវិធីណែនាំពីការសម្អាតទៅលើទារក ដែលមាន ២ វិធី គឺការជូត និងការងូតទឹក ។- ការជូតសម្អាតខ្លួន : ក្នុងករណីដែលទារកមិនទាន់ជ្រុះទងផ្ចិតទេនោះ អ្នកជាមាតាគួរសម្អាតក្នុងមួយថ្ងៃ ២ ដង គឺពេលព្រឹក និងពេលល្ងាច ព្រោះប្រសិនបើមិនធ្វើការជូតសម្អាតគេទេ នឹងធ្វើឲ្យផ្ចិតសើមបណ្ដាលឲ្យមានមេរោគជ្រៀតចូល ទៅក្នុងទងផ្ចិតរបស់គេបានយ៉ាងងាយបំផុត ។
- ការងូតទឹក : នៅពេលទារកមានអាយុចាប់ពី ៧-១០ ថ្ងៃ ទងផ្ចិតរបស់គេចាប់ផ្ដើមក្រៀម ហើយនៅទីបំផុតក៏របូតជ្រុះ ។ ក្រោយពេលឈានដល់ដំណាក់កាលនេះហើយ គួរប្តូរពីវិធីជូតសម្អាតមកងូតទឹកឲ្យគេវិញ ដើម្បីឲ្យរាងកាយរបស់គេកាន់តែមានអនាម័យ ។
- ការកក់សម្អាតក្បាល : មិនកំណត់ថា ជាការជូតសម្អាតខ្លួន ឬងូតទឹកអ្នកជាមាតាគួរកក់ជម្រះក្បាលឲ្យគេក្នុង ១ ថ្ងៃម្ដង តែប្រសិនបើអំឡុងពេលមានសីតុណ្ហភាពត្រជាក់ អាចកក់មួយថ្ងៃខានមួយថ្ងៃ ។
ការងូតទឹកឲ្យកូនបានដិតដល់ មិនត្រឹមតែធ្វើឲ្យកូនរបស់អ្នកបានស្រួលខ្លួនប៉ុណ្ណោះទេ ព្រោះការយកចិត្តទុកដាក់ដោយកាយវិការទន់ភ្លន់របស់អ្នក វាជួយឲ្យកូនតូចរបស់អ្នកទទួលបាននូវភាពកក់ក្ដៅ និងសុវត្ថិភាពព្រមទាំងជួយសាងភាពស្អិតល្មួតបានយ៉ាងល្អបំផុតទៀតផង ៕
Source: http://knowledge.cen.com.kh/index.php?option=com_content&view=article&id=901:2011-01-27-03-32-59&catid=49:family-and-child&Itemid=78
