ភ្នំពេញ: តារាកំប្លែង នាង ជួន ចាន់រតនា ហៅក្អយ ដែលពាក់ព័ន្ធទៅនឹងអំពើល្មើសជួលរថយន្តរបស់អ្នកដទៃ ហើយយកទៅបញ្ចាំនោះ ត្រូវបានម្ចាស់រថយន្តចំនួន ៣ នាក់ ផ្សេងទៀត ដាក់ពាក្យប្តឹងមកតុលាការឲ្យចាត់វិធានការលើរូបនាង តាមផ្លូវច្បាប់ទាក់ទិនទៅនឹងរថយន្តចំនួន ៨ គ្រឿង ទៀតដែលនាងក្អយបានជួលយកទៅ ។
កាលពីថ្ងៃទី១៤ កុម្ភៈ ឆ្នាំ២០១១ លោក គាំ ច័ន្ទមុនី ភេទប្រុស អាយុ៤៤ឆ្នាំ មានលំនៅដ្ឋានផ្ទះលេខ៨៥៨ ផ្លូវលេខ៣៥៥ សង្កាត់ទួលសង្កែ ខណ្ឌឫស្សីកែវ បានមកដាក់ពាក្យប្តឹងនៅតុលាការរាជធានីភ្នំពេញ ករណីនាង ជួន ចាន់រតនា ហៅក្អយ បានជួលរថយន្តរបស់គាត់ចំនួន ៥ គ្រឿងមានលុចស៊ីស ២ គ្រឿង និងកាមរី ៣ គ្រឿងថា យកទៅប្រើប្រាស់ ប៉ុន្តែបច្ចុប្បន្នកិច្ចសន្យាជួលចប់ហើយ ប៉ុន្តែនាងមិនបានឲ្យរថយន្តមកវិញទេ ។
ករណីទី២ គឺមានរថយន្ត២គ្រឿង ត្រូវបាននាងក្អយជួលពីបុរសម្នាក់ទៀត ហើយសំណុំរឿងនេះកំពុងស្ថិតនៅក្នុងចំណាត់ការរបស់ព្រះរាជអាជ្ញាអមតុលាការ ។
ចំណែកករណីទី៣ គឺមានរថយន្តមួយគ្រឿងទៀត ត្រូវបាននាងក្អយជួលពីបុរសម្នាក់ផ្សេងទៀត ហើយបាត់រថយន្តនោះរហូតមកដល់បច្ចុប្បន្ន ។
ចំណែកសំណុំរឿងទី៤ ចាត់ទុកថា នាង ជួន ចាន់រតនា ហៅក្អយបានដោះស្រាយរួចហើយ ប៉ុន្តែមិនទាន់បញ្ចប់នៅឡើយទេ ដោយសារតែជនរងគ្រោះកើតទុក្ខមិនសុខចិត្ត លើចំណាត់ការរបស់នគរបាលក្រសួងមហាផ្ទៃ ដែលចាប់បង្ខំជនរងគ្រោះម្នាក់ឈ្មោះ ទី សុធីតា ភេទស្រី ត្រូវចំណាយប្រាក់ចំនួន ១៦០០០ ដុល្លារ ដើម្បីយកទៅលស់រថយន្តរបស់ខ្លួនចំនួន ២ គ្រឿង ដែលនាងក្អយ ជួលហើយយកទៅបញ្ចាំនៅកុងស៊ី ដោយពុំមានប័ណ្ណសំគាល់យានយន្តផង តែម្ចាស់កុងស៊ីហ៊ានទទួលបញ្ចាំក្នុងតំលៃយ៉ាងខ្ពស់ ។
ក្នុងសំណុំរឿងក្តីទី៤ នេះផងដែរ ដែលពាក់ព័ន្ធទៅនឹងនាងក្អយ គឺត្រូវបានសំរបសំរួលដោះស្រាយនៅត្រឹមនគរបាលយុត្តិធម៌ ហើយបើជនរងគ្រោះមិនទទួលយកដំណោះស្រាយ ដូចដែលបានពោលមកខាងលើ ក៏គ្មានវិធីណាយករថយន្តរបស់ខ្លួនមកវិញដែរ ព្រោះក្រោយពីចាប់ខ្លួននាងក្អយហើយ មានមន្ត្រីថ្នាក់អន្ទ្រើសៗខ្លះចេញមុខដោយឥតអៀនខ្មាស សុំអន្តរាគមន៍ឲ្យដោះលែងនាងក្អយ ប៉ុន្តែដំណោះស្រាយរបស់ព្រះរាជអាជ្ញាអមតុលាការ គឺឲ្យជនប្រព្រឹត្តបទល្មើសដោះស្រាយសំណងរបស់ជនរងគ្រោះជាមុនសិន ទើបឈានទៅធ្វើការដោះលែងនាងក្អយវិញ ៕
Source: http://www.camnews.org/