តុលាការក្រុងភ្នំពេញ បានលើកយកសំណុំរឿងទី៣ របស់លោក សម រង្ស៊ី មកបើកសវនាការ ក្រោយពីតុលាការនៅក្នុងទីក្រុងប៉ារីស ប្រទេសបារាំង បានសម្រេចឲ្យលោក សម រង្ស៊ី ចាញ់ក្ដីរួចម្ដងទៅហើយ កាលពីខែមករា ឆ្នាំ២០០៩ កន្លងទៅ។
តុលាការក្រុងភ្នំពេញ នៅថ្ងៃទី៥ ខែមេសា ឆ្នាំ២០១១ បានបើកសវនាការកាត់ទោសកំបាំងមុខមេដឹកនាំគណបក្ស សម រង្ស៊ី គឺលោក សម រង្ស៊ី ក្រោមបទចោទថា លោកបានផ្សាយព័ត៌មានមិនពិត និងបទបរិហារកេរ្តិ៍រដ្ឋមន្ត្រីក្រសួងការបរទេសកម្ពុជា លោក ហោ ណាំហុង ដោយសារតែលោក សម រង្ស៊ី បានចោទប្រកាន់ថា លោក ហោ ណាំហុង ជាអតីតមេគុកបឹងត្របែក សម័យខ្មែរក្រហម។
តុលាការក្រុងភ្នំពេញ នឹងប្រកាសសាលក្រមនៃសំណុំរឿងនេះ នៅថ្ងៃទី១១ ខែមេសា នៅវេលាម៉ោង ៨កន្លះព្រឹក។ សវនាការរយៈពេលជាងកន្លះម៉ោងនៅល្ងាចថ្ងៃទី៥ ខែមេសា ឆ្នាំ២០១១ បានប្រព្រឹត្តទៅដោយមានលោក សេង នាង ជាចៅក្រមជម្រះក្ដី លោក ឯក ឆេងហួត ជាព្រះរាជអាជ្ញា និងលោក ការ សាវុត្ថ ជាមេធាវីការពារក្ដីឲ្យលោក ហោ ណាំហុង ជាដើមបណ្ដឹង។
មេធាវីរបស់លោក សម រង្ស៊ី ជាចុងចោទ គឺលោក ជូង ជូងី ពុំមានវត្តមានក្នុងសវនាការនោះទេ។ ចំណែកឯសកម្មជន និងតំណាងរាស្ត្រគណបក្ស សម រង្ស៊ី មិនបានចូលរួមដែរ គឺមានតែភាគីដើមចោទ បានចូលរួមក្នុងសវនាការនោះ។
មេធាវីការពារក្ដីឲ្យរដ្ឋមន្ត្រីក្រសួងការបរទេសកម្ពុជា លោក ហោ ណាំហុង គឺលោក ការ សាវុត្ថ ជាដើមបណ្ដឹង បានមានប្រសាសន៍ប្រាប់អ្នកកាសែតនៅក្រៅតុលាការក្រោយពីសវនាការនោះ បានបញ្ជាក់ថា លោកសង្ឃឹមថា តុលាការនឹងផ្ដល់យុត្តិធម៌ឲ្យកូនក្ដីរបស់លោក ៖ «ឯកឧត្ដម ហោ ណាំហុង គាត់អត់ចង់បានប្រាក់ពិន័យទេ សំខាន់រឿងទោសទេ កុំឲ្យគាត់ (សម រង្ស៊ី) ចេះតែដើរប្រឌិតរឿងយកទៅផ្សាយការដែលមិនពិត»។
លោក ការ សាវុត្ថ បានឲ្យដឹងទៀតថា លោកប្ដឹងទៅ លោក សម រង្ស៊ី មេដឹកនាំគណបក្សប្រឆាំងតាមមាត្រទី៦២ និងមាត្រាទី៦៣ នៃច្បាប់ព្រហ្មទណ្ឌសម័យអន្តរកាលអ៊ុនតាក់ (UNTACT) ក្រោមបទចោទថា ផ្សាយព័ត៌មានមិនពិត និងបទបរិហារកេរ្តិ៍ និងទាមទារសំណងជំងឺចិត្តជាទឹកប្រាក់ចំនួន ១០លានរៀល ស្មើនឹង ២.៥០០ដុល្លារអាមេរិក។
វិទ្យុអាស៊ីសេរីមិនអាចទាក់ទងមេធាវីរបស់លោក សម រង្ស៊ី លោក ជូង ជូងី បានទេ នៅថ្ងៃទី៥ ខែមេសា ឆ្នាំ២០១១ ដើម្បីសុំសេចក្ដីអត្ថាធិប្បាយ ដោយទូរស័ព្ទរបស់លោកបានបិទ។
តំណាងរាស្ត្រគណបក្ស សម រង្ស៊ី លោក យឹម សុវណ្ណ និងជាអ្នកនាំពាក្យបានមានប្រសាសន៍ថា ប្រជាពលរដ្ឋខ្មែរមិនចាប់អារម្មណ៍លើសវនាការនេះទេ ៖ «ដូច្នេះរឿងហ្នឹងដដែលៗ គ្រាន់តែគេប្រើប្រាស់កលល្បិចនយោបាយ ដើម្បីរំខានដល់គណបក្ស សម រង្ស៊ី ហ្នឹងជារឿងគួរឲ្យអស់សំណើច»។
មេដឹកនាំគណបក្ស សម រង្ស៊ី គឺលោក សម រង្ស៊ី ត្រូវបានរដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានប្ដឹងក្រោមបទផ្សាយព័ត៌មានមិនពិត និងបទបរិហារកេរ្តិ៍ កាលពីឆ្នាំ២០០៨ កន្លងទៅ ដោយសារតែលោក សម រង្ស៊ី បានធ្វើអត្ថាធិប្បាយមួយកាលពីថ្ងៃទី១៧ ខែមេសា ឆ្នាំ២០០៨ នៅវាលពិឃាដរបស់ខ្មែរក្រហម នៅបឹងជើងឯកថា រដ្ឋមន្ត្រីក្រសួងការបរទេសកម្ពុជា ជាអតីតមេគុកបឹងត្របែក សម័យខ្មែរក្រហម និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក គាត ឈន់ ជាអតីតលេខាធិការរបស់ ប៉ុល ពត។
តុលាការនៅក្នុងទីក្រុងប៉ារីស ប្រទេសបារាំង បានកាត់សេចក្ដីឲ្យលោក សម រង្ស៊ី ចាញ់ក្ដីជាមួយលោក ហោ ណាំហុង កាលពីថ្ងៃទី២៧ ខែមករា ឆ្នាំ២០០៩ កន្លងទៅ ក្រោមបទបរិហារកេរ្តិ៍ លោក ហោ ណាំហុង ដោយបានបង្គាប់ឲ្យលោក សម រង្ស៊ី សងជំងឺចិត្តលោក ហោ ណាំហុង ចំនួន ១អឺរ៉ូ ស្មើនឹង ១ដុល្លារកន្លះ។
លិខិតឆ្លើយបំភ្លឺរបស់មេគុកទួលស្លែង ឬមន្ទីរស.២១ លោក កាំង ហ្កេចអ៊ាវ ហៅ ឌុច ដែលតុលាការក្រុងភ្នំពេញ បានលើកមកបង្ហាញនៅថ្ងៃទី៥ ខែមេសា ឆ្នាំ២០១១ បានអះអាងថា លោក ហោ ណាំងហុង ឬហៅបងយ៉ែម ជាអ្នកទោសរបស់ខ្មែរក្រហម គឺរង់ចាំតែថ្ងៃគេយកមន្ទីរស.២១ ដើម្បីសម្លាប់។
លោក ហោ ណាំហុង ធ្លាប់បានប្រាប់អ្នកកាសែតថា លោកមានការឈឺចាប់ចំពោះការចោទប្រកាន់របស់លោក សម រង្ស៊ី ពីព្រោះសមាជិកគ្រួសាររបស់លោកជាង ១០នាក់ ត្រូវបានខ្មែរក្រហមយកទៅសម្លាប់៕
Source: http://www.camnews.org/